सर्वात्मना ब्रह्मकुलं निषेव्यताम्

विदितमेवेदं यत् भगवन्माययोरुगुणनिबन्धनेस्मिन् सांसारिके पथि अतिश्रमेण चरन्तः नष्टस्मृतयः आत्मोद्धारोपायमजानन्तः परिखिन्ना वयं न कथञ्चिदपि महादुःखाकूपारस्यास्य पारं गन्तुं प्रभवाम, न कयापि युक्त्या मायामोहात् स्वात्मानं उद्धराम महदनुग्रहमन्तरेण । भगवद्धर्मपरैः विनीतैरस्माभिः यत्सेवयाशेषगुहाश्रयः स्वराड् विप्रप्रियः ईश्वरः कामं तुष्यति तादृशब्रह्मकुलं सर्वदा निषेव्यताम् ।
अत उक्तं भागवते -
यत्सेवयाशेषगुहाश्रयः स्वराड्विप्रप्रियस्तुष्यति काममीश्वरः ।
तदेव तद्धर्मपरैर्विनीतैः सर्वात्मना ब्रह्मकुलं निषेव्यताम् ।।